அவ்வளவு வெயில்...

வெயில் அவ்வளவாக இருக்கிறதென்று
எல்லோரும் நொந்து கொள்கின்றனர்

வியர்த்துக் கொண்டு வீடு வந்த நண்பர்
தன் வியர்வை நெடியை மறக்க
என்ன வெயிலப்பா இது!
எனச் சொல்கிறார்

மின் விசிரி இல்லாத வீட்டில்
போய் அமரும் போது
எங்களை விடவும் அவர்களுக்கு
அதிக சங்கடம் ஏற்படுகிறது.

வெயில் எவ்வளவு கடுமையாக
இருந்தாலும்
ஆண்கள் குடைபிடிக்க
விரும்புவதேயில்லை.

வெயில் ஆடைகளின் மேல்
அப்படி ஒரு வெறுப்பை
ஏற்படுத்திவிடுகின்றது

வீட்டில் கூரை திருத்திக்
கொண்டிருப்பவர்
அவ்வளவான இந்த வெயிலை நினைத்து
எவ்வளவோ மகிழ்ந்து கொண்டிருக்கிறார்.

2011-10-10